Dan Comma |
|
| Interlingua es optimal como lingua de correspondentia, proque milliones de homines lo comprende immediatemente. Ci es alcun bon consilios pro haber un correspondentia successose:
1. Trova belle timbros e cartas postal. Es sempre un placer vider e reciper belle cosas, specialmente de un amico o amica. Tu certemente va conservar le litteras que tu recipe per medio de tu correspondentia, e assi es amusante leger e reguardar le litteras de novo e de novo.
2. Invia sempre le litteras per avion, mesmo si isto probabilemente es un pauco plus costose. Le littera va attinger tu amico o amica multo plus rapidemente per avion que per nave o traino.
3. Responde al litteras recipite tanto rapido como possibile. Non pone le littera foras de vista, de maniera que tu oblidara haber lo recipite, e consequentemente oblidara responder a illo. Tu amico o amica de penna perdera le interesse in corresponder con te.
4. Scribe in un linguage clar. Usa le parolas le plus frequente e evita illos que es usate rarmente. Isto rende le communication plus facile pro totos.
5. Iste es probabilemente le puncto l plus importante: Scribe distinctemente, de maniera que tu amico o amica de penna pote leger facilemente lo que tu ha scribite. Eventualmente usa litteras majuscule, computator o machina a scriber.
6. Quando tu corresponde con collegas del Tertie Mundo (Asia, Africa, America Latin e Europa Oriental), es conveniente inviar annexe un Coupon Responsa International, que tu pote comprar in le officio postal de tu citate, como garantia de responsa.
7. Rememora te que le adresse debe poter esser interpretate per le functionarios del officios de posta. Scribe le nomine del pais in tu proprie lingua. Le resto del adresse debe esser scribite in le lingua del pais de destination. Tu absolutemente non debe facer traductiones del nomines national (p.ex.: street, strada, rue, rua, strasse, via, gatan, calle, etc.)
|
| | |
