| Un vice quando le molbos esseva in Århus, illes videva un nave passar remolcante un barchetta. Durante longe tempore, illes esseva in dubita de lo que illes videva. Alcunos credeva que illo esseva un grande phoca, alteres que illo esseva un balena. Ma quando illes se approximava plus, illes videva que illo esseva un nave, e alora le barchetta debeva esser su parvo. Illes habeva longemente desirate posseder un grande nave, ma illes non habeva jammais habite le moneta pro comprar se uno. Pro isto illes ora habeva le idea de comprar le barchetta, proque illes sperava que illo tosto crescerea e devenirea equalmente grande como su matre. Illes negotiava con le capitano super illo, e finalmente illes comprava le parvo e partiva con illo a casa. Quando illes habeva arrivate al terra, illes attachava le parvo del nave al plagia, ubi cresceva herba bellemente verde. Illes lo moveva cata singule die, ma proque illes non pensava que illo habeva crescite multo post un mense, illes comenciava parlar de que facer pro facer lo crescer. Illes concordava poner lo in le prato le plus grasse. La illo debeva prosperar, illes pensava. Ma quando un nove mense habeva passate, illo non habeva crescite del toto. Le molbos ora esseva convincite que illes habeva essite dupate, e illes se reprochava de haber comprate lo. Il ya esseva clar pro omnes que illo esseva un povretto malade e miserabile, que non jammais devenirea qualcosa. Un de illes proponeva que illes o debeva dar lo in excambio o transportar lo retro al capitano a fin que illo poteva esser ancora un anno presso su matre. Isto illes omnes trovava un bon idea, e illes navigava immediatemente retro al capitano con illo. Quando illes se approximava al nave, le barchetta comenciava bascular in le mar. “Il ha ancora vita in illo,” diceva le molbo le plus vetere. “Vide, como le parve povretto gaude a retornar a su matre!” Illes dava al capitano un grande summa de moneta a fin que le parvo esseva permittite esser ancora un anno presso su matre, usque illo mesme habeva apprendite mangiar herba.
Mols es un parte geographic del peninsula danese Jutlandia. Mols es ric de collinas. Le habitantes de Mols es appellate molbos e es considerate un poco stupide per le resto del daneses. Assi existe multe historias del molbos. ------------------------------------------------ QUESTIONES AL HISTORIA Que credeva le molbos vider? Qual esseva lor plano? Con qui negotiava illes? A ubi attachava illes le parvo? Ubi voleva illes poner le parvo post un mense? Qual esseva lor solution? ------------------------------------------------
VOCABULARIO remolcar traher, tirar barchetta parve barca, parve nave esser in dubita non saper que facer approximar se venir plus proxime parvo baby longemente durante longe tempore comprar pagar moneta crescer devenir plus grande equalmente grande exactemente si grande capitano chef del nave partir ir via attachar ligar, fixar mense 30 (o 31) dies concordar esser del mesme opinion prato terra con herba grasse corpulente, ric prosperar devenir ric dupar fraudar reprochar se esser triste povretto parve cosa povre malade non san e fresc in excambio haber un altere in vice de illo presso vicin, proxime bascular mover se a ambe lateres
|